Молитва священномученику Игнатию Богоносцу

За исповедание Христа в Римской империи епископ Игнатий Богоносец
был приговорен императором Траяном к смертной казни. Святитель был брошен
на растерзание львам в Колизее 20 декабря 107 г.

О, вели́кий святи́телю Богоно́сный Игна́тие! К тебе́ припа́даем и мо́лим
тя, при́зри на ны гре́шныя, прибега́ющия к твоему́ заступле́нию!
Умоли́ Го́спода, да прости́т нам вся согреше́ния на́ша: ты му́ченически
ду́шу твою́ за ве́ру положи́л еси́, да́руй и нам му́жество во всем
подража́ти тебе́.
Ничто́ в жи́зни не возмогло́ отлучи́ти тя от любве́ ко Го́споду, ни
ле́стныя обеща́ния, ни преще́ния, ни угро́зы, ниже́ са́мыя му́ки: ты с
ра́достию предста́л пред зверьми́ на смерть лю́тую и, я́ко а́нгел,
возлете́л еси́ во оби́тели Отца́ на́шего Небе́снаго; и моли́тва твоя́
мно́го мо́жет пред Го́сподем.
Бу́ди же, святы́й уго́дниче, предста́телем у Го́спода: за ны,
недосто́йнии рабы́ твоя́; помога́й и всем правосла́вным христиа́ном
святы́ми твои́ми моли́твами ко всемогу́щему Бо́гу, да изба́вит ны от
гла́да, тру́са, гра́да, бездо́ждия и смертоно́сных боле́зней, и да
да́рует нам здр́авие и спасе́ние.
Бу́ди же нам помо́щник ско́рый во вся́кой ско́рби, наипа́че в час
кончи́ны на́шея яви́ся нам све́тлым защи́тником и хода́таем и умоли́
Го́спода сподо́битися всем нам, тебе́ ны́не те́пле моля́щимся, получи́ти
по христиа́нской кончи́не Небе́сное Ца́рствие, иде́же вси святи́и вку́пе
с тобо́ю ве́чно сла́вят Отца́ и Сы́на и Свята́го Ду́ха.
Ами́нь.

***

10.11.2024